रयत शिक्षण संस्थेच्या दादा पाटील महाविद्यालय आणि द युनिक अकॅडमी, पुणे यांच्या संयुक्त विद्यमाने आयोजित केलेला “स्पर्धा परीक्षा मार्गदर्शन व पुस्तक प्रदर्शन” कार्यक्रम मोठ्या उत्साहात पार पडला. विद्यार्थ्यांना स्पर्धा परीक्षांसाठी आवश्यक असलेले मार्गदर्शन मिळवून, या क्षेत्रातील महत्त्वपूर्ण माहिती मिळवण्यासाठी हा कार्यक्रम खूप उपयुक्त ठरला.
कार्यक्रमाच्या मुख्य आकर्षणांपैकी एक होते द युनिक अकॅडमी, पुणे येथील व्याख्याते दिनेश ताठे यांचे मार्गदर्शन. त्यांनी स्पर्धा परीक्षांच्या बदलत्या स्वरूपाबद्दल सखोल विवेचन केले आणि विद्यार्थ्यांना स्पर्धा परीक्षा का द्यावी, यावर सुस्पष्ट मार्गदर्शन दिले. दिनेश ताठे यांनी सरकारी नोकरीचे महत्त्व, सामाजिक प्रतिष्ठा, समाजसेवेसाठी योगदान, आणि प्रगतीची दिशा याबाबत विद्यार्थ्यांना प्रोत्साहन दिले.
कार्यक्रमाच्या अध्यक्षस्थानी प्राचार्य डॉ. संजय नगरकर होते. त्यांनी आपल्या भाषणात स्पर्धा परीक्षांच्या महत्त्वावर प्रकाश टाकला आणि यश मिळविलेल्या विद्यार्थ्यांचे उदाहरण देऊन त्यांना मार्गदर्शन केले. तसेच, विद्यार्थ्यांनी मोबाईलचा उपयोग सकारात्मक दृष्टिकोनातून करावा, यावर त्यांनी विशेष भर दिला.
कार्यक्रमात द युनिक अकॅडमीचे समन्वयक चंद्रकांत खराडे यांची विशेष उपस्थिती होती. प्रास्ताविक प्रा. संदीप गोंदके यांनी केले, तर आभार डॉ. दिग्विजय कुंभार यांनी मानले. सूत्रसंचालन प्रा. रामकृष्ण काळे यांनी केले. या कार्यक्रमात महाविद्यालयातील विविध विभागांचे विभागप्रमुख, मार्गदर्शक शिक्षक आणि विद्यार्थ्यांची मोठ्या संख्येने उपस्थिती होती.
कार्यक्रमाच्या दुसऱ्या भागात द युनिक अकॅडमीच्या पुस्तक प्रदर्शनाचे आयोजन करण्यात आले होते. ज्याचा अनेक विद्यार्थ्यांनी उत्साहाने लाभ घेतला. या प्रदर्शनात स्पर्धा परीक्षा तयारीसाठी आवश्यक असलेली विविध पुस्तके आणि मार्गदर्शन सामग्री उपलब्ध होती. एकंदरीत, हा कार्यक्रम विद्यार्थ्यांसाठी अत्यंत उपयुक्त ठरला. स्पर्धा परीक्षांसाठी योग्य दिशादर्शन मिळाल्याने उपस्थित विद्यार्थ्यांनी समाधान व्यक्त केले.